මුහුදු රළ නවතිනතුරා නැගෙයි ප්‍රේමයේ රළ - Alaigal Oivathillai 1981 [ Tamil ]
මෙලොව සාහිත්‍ය බිහි වූ දින සිට අද දක්වා ජනයා ඉතා කැමත්තෙන් රසවිඳින මාතෘකාවක් තිබේ නම් එය ප්‍රේමයයි. මේ සම්බන්ධයෙන් කොපමණ නිර්මාණ බිහි වූව ද ඊට ලැබුණු ප්‍රතිචාරයන්හි අඩුවක් නොවිය. ප්‍රේමය විඳීමට ආගම්, භාෂා, ජාති, කුල වයස් භේදයක් නැත. කෙසේ වෙතත්, මිනිසා විසින් ජීවත්වීම සඳහා ඇති කරගත් සමහර නිර්ණායක පවා මෙවැනි ප්‍රේම වෘත්තාන්ත හරහා දැඩි ලෙස විවේචනය කරනු ලැබු අවස්ථා ද දැක ගත හැකිය. එහෙත් මෙලෙස බිහි වන නිර්මාණ අතුරෙන් කාලාන්තරයක් මතකයේ තිබෙන්නේ එහි ඇති සුවිශේෂි ලක්ෂණ හේතුවෙන්ය. එලෙස බොහෝ පිරිසකගේ මතකයේ තවමත් රැඳි තිබෙන චිත්‍රපටියක් ලෙස 1981 වසරේදී තිරගත වූ අලෛගල් ඕයිවදු ඉල්ලෛ (Alaigal Oivathillai) චිත්‍රපටිය හඳුන්වා දිය හැකිය.
නව යොවුන් විය යනු ආදරය සොයා යන වයස් සීමාවකි. එම වයසේ සිටින තරුණ තරුණියන්ට ඉහත සඳහන් කළ සීමාවන් සම්බන්ධයෙන් කිසිදු තැකීමක් ද නැත. ඔවුන්ට අවශ්‍ය වන්නේ ප්‍රේමය පමණය. විච්චු යනු දුප්පත් හින්දු පවුලක තරුණයෙකි. ඔහුගේ මව ගමෙහි සිටින දරුවන්ට සංගීතය උගන්වමින් සිය ජීවිකාව ගෙන යමින් සිටියයා. එම ගම්මානෙහි ජීවත් වූ ධනවත් කතෝලික ආගමිකයෙකු වන ඩේවිඩ් නැගණිය වන මේරි සහ විච්චු අතර ආදර සබඳතාවයක් ගොඩ නැගුණි. මෙම ආදරයට විච්චුගේ මිතුරන්ගේ සහය ද ලැබුණි. සාමාන්‍යයෙන් සිය මිතුරාගේ ප්‍රේමය වෙනුවෙන් විවිධ ආකාරයෙන් සහය ලබා දෙන මිතුරන් සිටිම පුදුමයක් ද නොවේ. එහෙත් මෙහි ඇති විශේෂත්වය වන්නේ ඔවුන් සියලු දෙනා විවිධ කුල සහ ආගම් නියෝජනය කිරීමයි. ඔවුන් විච්චු මේරිගේ ආදරය වෙනුවෙන් සිය ජීවිතය වූව ද කැප කිරීමට තීරණය කර තිබුණේ, මේරිගේ සහෝදරයා ඉතා දරදඬු පුද්ගලයෙකු බව දැනගෙනය. ඩේවිඩ් මෙම ගම්මනය තුළ සිය අණසක පතුරුවාගෙන සිටි අයෙකි.
අධ්‍යාපනය ලැබීම සඳහා නගරයට ගොස් පැමිණ සිටි මේරි සහ විච්චු අතර ආදරය ඇති වූයේ නම් ක්ෂණයකින් නොවේ. ඔවුන් දෙදෙනා පෙර සිටම නිතරම දබර ඇති කරගත්තෝය. සැබෑ ප්‍රේමයට මූලික අඩිතාලම මෙලෙස ඇති කරගන්නා වූ දබරවල ප්‍රතිඵලයක් ලෙස ඈත අතීතයේ සිට සිනමාකරුවන් විශ්වාස කරන කරුණකි. එය මෙහිදී ද අධ්‍යක්ෂකවරයා විසින් යොදාගෙන තිබුණි. නාගරික පන්නයට හැදි සිටි මේරි සහ ග්‍රාමිය පන්නයට හැදුණු විච්චු අතර හට ගන්න දබරයන් ඉතා අපූරු ලෙස අධ්‍යක්ෂකවරයා විසින් නිර්මාණය කර තිබුණි. ඇය ඉංග්‍රීසි බසින් කතා කරන විට මොවුන් ඒ වෙනුවෙන් ඇනුම් පද කියූ අවස්ථා ඉතා අපූරුය. ඇයගේ සංගීත හැකියාවට උපහාසාත්මක විච්චු විසින් ගායන කරනු ලැබු ගීතය අදටත් බොහෝ අයගේ දෙවසන් තුළ රැඳි තිබේ යැයි විශ්වාස කළ හැකිය. මෙහි ප්‍රතිඵලයක් ලෙසින් මේරි විච්චුගේ මවගෙන් සංගීතය හැදෑරීම සඳහා ගියාය. ඒ සමඟම මොවුන්ගේ ආදරය ද ක්‍රමයෙන් වර්ධනය විය. යම් යම් බාධක පැමිණිය ද ඒ සියල්ල මොවුන් දූවිල්ලකටවත් මායිම් නොකට රහසින් හමුවී ආදර බස් කියමින් කාලය ගත කළෝය. නමුත් මොවුන්ගේ ආදරයට විශාල බාධාවක් ලෙසින් මේරිගේ විභාගයේ ප්‍රතිඵල නිකුත් විය. වැඩිදුර අධ්‍යාපනය සඳහා ඇයට යළිත් නගර වෙත පිටත්ව යාමේ කාලය උදාවිය. මෙම ගමන නැවැත්වීමට මේරි සහ විච්චු යෙදු උපායන් පවා ඉතා අපූරුය. ග්‍රාමිය පරිසරය තුළ ජීවත් වන තරුණියන් අතර එම ක්‍රමවේදය ඉතා ජනප්‍රියය. අධ්‍යක්ෂකවරයා මෙවැනි කාරණා සම්බන්ධයෙන් ද සිය අවධානය යොමු කිරීම සම්බන්ධයෙන් ඇති වන්නේ විශ්මයකි.
මිනිසෙකු තිරිසනෙකු වීමට ගත වන්නේ ඉතා ස්වල්ප නිමේෂයකි. ඩේවිඩ්ට ද ඉන් ගැලවීමක් නොවිය. චිත්‍රපටියේ ආරම්භයේ සිට ඔහු සිය සහෝදරියට දැඩි ලෙස සෙනෙහස දක්වන්නෙකු ලෙසත්, කුල ආගම් භේද නොතකන ලෙස ඔහුගේ චරිතය අප ඉදිරියේ ගොඩ නගා තිබුණි. විශේෂයෙන්ම සංගීතය හැදෑරිමට හින්දු නිවසකට යාමට මේරිගේ නෑනා විරුද්ධ වන විට ද ඩේවිඩ් ඊට අනුමැතිය දුන්නේය. ඒ වෙනුවෙන් ඔහු පැවසුවේ අපට අවශ්‍ය දෑ වෙනුවෙන් අප යා යුතු බවය. ඔහුගේ මෙම ගතිගුණ සියල්ල රඳා පැවැතුණේ, තම නිවසේ සේවිකාව දිය රෙද්ද පිටින් දකිනතුරාය. ඒ දක්වා ගොඩනගා තිබු ප්‍රතිරූපය පොඩි පට්ටම් විය. මෙම කාරණාව අදටත් ඉතා හොඳින් ගැළපෙනු ඇත. විවිධ පිරිස් ගොඩනගාගෙන ඇති ප්‍රතිරූපය බිඳ වැටෙන්නේ ඉතා කෙටි කාලයක් තුළය. ඩේවිඩ්ගේ කාමාශාව වෙනුවෙන් සේවිකාව බිලි වූ අතර ඔහුගේ වරද නිවැරදි කිරීමට ගොස් ඩේවිඩ්ගේ බිරිඳ වන එලිසි හට ද ලැබුණේ නරක නාමයකි. සිය සැමියා විසින් කරනු ලබන සියලු අසමත් ක්‍රියාවලට සහය වන බිරින්ඳෑවරුන්ටත් මෙම සිදු වීම හරහා දැඩි පහරක් එල්ල කර තිබුණා යැයි කීමට හැකිය. එමෙන්ම මොවුන් දෙපළ හරහා යෝජිත විවාහවල ඇති ප්‍රතිවිපාක සම්බන්ධයෙන් ද දැඩි විවේචනයක් ඉන් එල්ල කර තිබු ආකාරයක් දැකගත හැකි විය. මුදල් සහ දේපළ බලාපොරොත්තුවෙන් සිදු වන්නා වූව විවාහයන්වල ප්‍රතිඵලයක් ලෙස මොවුන් දෙදෙනා අතර ඇති වූ සංවාදය පෙන්වා දිය හැකිය.
මුදල් සහ දේපළ කෙරෙහි තිබු බලාපොරොත්තුවෙන් සිදු වූ යෝජිත විවාහයත් වෙනත් ආගමක, කුලයක තරුණයෙකු සමග හාද වන මේරිගේ ආදරය අතර තිබු වෙනස ඉන් එලිසි හට මනා ලෙස අවබෝධ වන්නට විය. මේරිගේ ආදරයට එලිසි උදව් කිරීමට තීරණය කළේ ද, ඇයගේ යෝජිත විවාහයේ ඇති වූ දුක්ඛිත ස්වභාවය නිසාමය. ඩේවිඩ් දැඩි ආගමික භක්තියෙකු ලෙස සිටි ඔහුගේ සැබෑ ස්වරූපය මතු වූයේ පල්ලියේ පියතුමා අදාළ සම්බන්ධය ගැන කතා කරමින් අනතුරුවය. ඔහු ආගමිකත්වය නමැති සමක් පොරවාගෙන සිටියේ ය. නමුත් සැබෑ ලෙසම ඔහුගේ චරිතය හරහා ගම්‍ය වූයේ ධනපති පංතිය සහ නිර්ධන පංතිය අතර පවතින භේදයයි. එය වසා ගැනීමට ඔහු ආගමිකත්වය භාවිතා කරනු ලැබිය. ඔහුගේ වෙස් මුහුණ අවසානයේදී මේරි සහ විච්චු ගලවා දැමු ආකාරය ද ඉතා අපූරුය. මිනිසා විසින් ඇති කරනු ලැබු නිර්නායක මොවුන් විසින්ම විනාශ කරන ලදි. ප්‍රේමය යනු ආගම්, ජාති, කුල සහ ධනවත් දුප්පත් භේද නොකතා ගමන් කරන්නා වූ සුළඟක් බවට අධ්‍යක්ෂකවරයා විසින් ප්‍රේක්ෂකයා වෙත හැඟවීමට ගත් උත්සහය ප්‍රශංසනීයයි.
මෙවැනි ග්‍රාමීය පරිසරයක තේමාවකින් යුතු චිත්‍රපටියක සංගීතය ඉටු කරනු ලබන්නේ ඉතා වැදගත් මෙහෙවරකි. අධ්‍යක්ෂක භාරදිරාජා මෙවර ද සිය චිත්‍රපටියේ සංගීත අධ්‍යක්ෂක විදිහට තෝරගනු ලැබුවේ ඉලයරාජාය. ඒ, මෙවැනි තේමාවක් පාදක කරගෙන කරන්නා වූ නිර්මාණයට ඔහුට වඩා සුදුස්සෙකු නොමැති බව භාරදිරාජා හොඳින් වටහගෙන සිටි හේතුවෙන් ය. චිත්‍රපටියෙහි අඩංගු ගීත සියල්ලම ඉමහත් ජනාදරයට පත් විය. චිත්‍රපටිය සඳහා ගීත 12 ක් පටිගත කරනු ලැබු අතර ඉන් එක් ගීතයක් හැර සෙසු සියල්ලම චිත්‍රපටියට ඇතුළත් විය. ගංගෛ අමරන් විසින් රචනා කරනු ලැබු Putham Pudhu Kaalai ගීතය චිත්‍රපටියට ඇතුළත් නොවු අතර එය ඉමහත් ජනාදාරයට පත් විය. කෙසේ වෙතත් මෙම ගීතය 2014 වසරේ තිරගත වූ මේගා නමැති චිත්‍රපටියට යොදා ගැනීමත් විශේෂත්වයකි.
මෙහි සංගීතයට අමතරව කැමරා භාවිතය සම්බන්ධයෙන් විශේෂ අවධානයක් යොමු කළ යුතුව තිබුණි. එම කාලයේදී කැමර ද්වීත්වයක් භාවිත කිරීමට නොහැකි අවස්ථාවලදී පවා එක් කැමරාවකින් පෙම්වතුන්ගේ හැඟීම් කැමරාවට හසුකරගත් ආකාරය අති විශිෂ්ඨය. ග්‍රාමිය පරිසරයේ දර්ශන පවා කැමරා අධ්‍යක්ෂක බී. කන්නන් විසින් ඉතා අපුරු ලෙස රූගත කර තිබුණි.
මෙම චිත්‍රපටියේ විච්චුගේ චරිතය සඳහා සුරේෂ් සහ මුරලි යන අයගේ නම් යෝජනා වූව ද අවසානයේදී මෙහි ප්‍රධාන චරිතය කිරීමේ අවස්ථාව හිටපු ජනප්‍රිය නළුවෙකු වන මුත්තුරාමන්ගේ පුතා වන කාර්තික් හට හිමි විය. මේරිගේ චරිතය වෙනුවෙන් තෝරාගනු ලැබුවේ රාධා ය. ඩේවිඩ්ගේ චරිතය ත්‍යාගරාජන් විසින් නිරූපණය කරන ලදි. මොවුන් තිදෙනාගේම කුළුඳුල් චිත්‍රපටිය මෙය වීමත් විශේෂත්වයකි. එමෙන්ම මෙම චිත්‍රපටිය වෙනුවෙන් හොඳම චිත්‍රපටිය, අධ්‍යක්ෂක, සංගීත අධ්‍යක්ෂක, ගීත රචනය (වෛරමුත්තු), කැමරා අධ්‍යක්ෂක, පිටපත් රචනය (මනිවන්නන්), කුළුඳුල් නළුවා සහ නිළිය යන සියලු සම්මාන තමිල්නාඩු ප්‍රාන්ත සිනමා උළලෙහි Alaigal Oivathillai චිත්‍රපටිය ඉදිරියේ ලියැවුණි.
මෙම චිත්‍රපටියේ ඇති ගී තනු වෙනත් චිත්‍රපටි වෙනුවෙන් විවිධ අවස්ථාවලදී යොදාගත් ආකාරයක් ද දැකගත හැකි විය. මෙලෙස භාවිත කිරීම හරහා පෙනි යන්නේ 1981 වසරේ තිරගත වූව ද එම චිත්‍රපටියෙහි අඩංගු කොටස් අදටත් රසවිඳිය හැකි බවය. මෙම චිත්‍රපටිය තෙළිගු බසින් Seethakoka Chiluka ලෙසත්, Lovers ලෙසින් හින්දියෙන් ද ප්‍රතිනිර්මාණය විය.
✍️ ජෙගන් ගනේෂන්
Comments
Post a Comment