විවාහයේ කටුකබව හොඳින් තේරුම් ගත් තරුණයෙකු ප්‍රේමයේ පැටලුණ අමුතුම කතාව - Pammal K. Sambandam [2002]

මිනිසුන් ලෙස මෙලොව උපත ලබන සියලු දෙනාම නිසි වයස පැමිණීමෙන් අනතුරුව විවාහ විය යුතු බවට සමාජය විසින් නිර්ණායකයක් පනවා තිබේ. ඊට අනුකූලවන නොවන අයට සමාජයෙන් සහ ඔවුන්ගේ පවුලේ අයගෙන් ලැබෙන අවලාදයන් අසීමිතය. විවාහයේ තිබෙන කටුකබව හොඳින් තේරුම් ගත් තරුණයෙකු සහ විවාහයක් සිදු කරගනිමින් පිරිමියෙකුට යටත්ව ජීවත්වීමට අකමැති තරුණියක අතර සිදු වන ගැටුම ආදරය දක්වා වර්ධන වූ ආකාරය සම්බන්ධයෙන් වන කතාවක් හාස්‍ය මුසු කරමින් ඉදිරිපත් කළ චිත්‍රපටියක් ලෙස Pammal K. Sambandam හඳුන්වා දිය හැකිය.

චිත්‍රපටියෙහි නළුවන්ගේ සටන් ජවනිකා සඳහා රඟදක්වන ස්ටන්ට් ශිල්පියකු ලෙස කටයුතු කරන පම්මල් කේ. සම්බන්ධම් විවාහය යන වචනයට පවා වෛර කරන්නෙකි. ඔහුගේ නමෙහි ඇති කල්‍යානම් එනම් විවාහය යන කොටසෙහි මුල් අකුර පමණක් සිය නමට එකතු කරගන්න තරමට ඔහු විවාහයට වෛර කරන්නෙකි. එහෙත් ඔහුගේ සහෝදරයා වන ආනන්ද් ඊට හාත්පසින්ම වෙනස් චරිතයකි. ඔහු තරුණියකට ආදරය කර සම්බන්ධම්ට රහසින් විවාහ කර ගත්තේය. එම විවාහයට සාක්ෂිකාරිය ලෙස අත්සන් කරනු ලබන්නේ වෛද්‍යවරියක වන ජානකි ය. ජානකි සහ පම්මල් කේ. යන දෙදෙනාම මාර්ග දෙකක ගමන් කරන්නෝ වෙති. ඔවුන් දෙදෙනාගේ පළමු හමුව සිදු වන්නේ ද ගැටුමකින් ය. අනතුරුව සිදු වන අනතුරකින් සම්බන්ධම් තුවාල ලැබු අතර එහි සැත්කම කරනු ලබන්නේ ද ජානකි විසිනි. එහිදී සිදු වන වැරදීමක් හේතුවෙන් ඇය සිය ඔරලෝසුව සම්බන්ධම්ගේ උදරය තබාම සිය සැත්කම අවසන් කළාය. එම ඔරලෝසුව සම්බන්ධම්ට හොරෙන් යළිත් ගැනීමට සඳහා වන සැත්කමක් කිරීමට වෙර දරණ ජානකිගේ ක්‍රියාවන් හේතුවෙන් ඇය තමන්ට ආදරය කරන බවට සම්බන්ධම් වරදවා වටහගත්තේය. කිසිදු දිනක විවාහයක් සිදු නොකරගන්නා බවට වන ඔහුගේ ප්‍රතිපත්තිවලට ඉන් අනතුරුව කුමක් සිදු වූයේ ද සහ එම වැරදි වැටහීම හේතුවෙන් සිදු අකරතැබ්බයන් ඉතා අපූරුවට ඉදිරිපත් කිරීමට අධ්‍යක්ෂවරයා සමත් විය.

විවාහයෙන් අනතුරුව පවුල් ජීවිතය සාර්ථක වීමට නම් අඹුසැමියන් අතර මනා අවබෝධයක් පැවතිය යුතුය. පෙම්වතිය තමාට අහිමි වනු ඇතැයි බියට ආනන්ද් පැවසු මුසාව ඔහුගේ බිරිඳ වන මාලති අතර සිදු වන මතභේදයක් ඇති කරනු ලැබිය. අඹුසැමියන් අතර ඇති වන ප්‍රශ්නවලදී පිටස්තරයින්ගේ කීම අසා හැසිරීමේදී සිදු වන්නේ ඔවුන් අතර තිබෙන විරසකය තවදුරටත් වර්ධන වීමය. මාලති සිය පවුල් ප්‍රශ්නය සම්බන්ධයෙන් නිතරම උපදෙස් ගනු ලැබේ ජනකිගෙන් ය. ජානකි යනු කාන්තා විමුක්තිය උදෙස සටන් කරන්නීයකි. නිතරම ඇය මාලතිට ලබා දුන් යෝජනා වූයේ සිය ස්වාමි පුරුෂයාට අවනත නොවි සිටිය යුතු බවටය. ආනන්ද් උපදෙස් ගනු ලැබුවේ සිය සහෝදරයාගෙන් ය. ඔහුගේ හැකි සෑම අවස්ථාවකදීම ලබා දෙනු ලැබුවේ බිරිඳව යටත් කරගන්නා ආකාරයයි. මෙවැනි කරුණු කාරණාවලදි සිදු වන්නේ අඹුසැමියන් දෙදෙනා අතර ඇති වන දබරය තවදුරටත් වැඩි වීම මිස අඩුවීමක් නොවේ. මෙම චිත්‍රපටියේදී ආනන්ද් සහ මාලතිගේ ජීවිතය උපුටා ගනිමින් ප්‍රකාශ කළ හැකිය. අඹුසැමියන් අතර ඇති වන දබරවලදී අන්අයගේ උපදෙස් නොගෙන තමන් විසින්ම විසඳාගත යුතුය යන උපදෙස අධ්‍යක්ෂකවරයා සහ දෙබස් රචකයා විසින් දීර්ඝ දෙබස්වලින් පැහැදිලි නොකර ඉතා කෙටි දර්ශන තුළින් ප්‍රේක්ෂකයාට හේත්තු ගැන්වීමට ගත් උත්සහයට ප්‍රශංසා කළ යුතුමය.

සම්බන්ධම් සහ ජානකි යනු මත දෙකක් නියෝජනය කරන දෙදෙනෙකි. එහෙත් ජානකිට සිය අරමුණ ඉටු කරගැනීම සඳහා ඔහු හා සමීපව කටයුතු කරන්නට විය. එහිදී සිදු වන්නේ කවුරුත් නොසිතු ගාලගෝට්ටියකි. එමෙන්ම සම්බන්ධම් යනු ඔහුගේ පවුලේ අය විසින් අනුගමනය කරනු ලබන සිරිත් විරිත් වලට හාත්පසින් වෙනස්ම චරිතයකි. යම් යම් සම්ප්‍රදායන්වලින් පිට පැනීම සම්බන්ධයෙන් ඉතා උපහාසත්මක චිත්‍රපටියෙන් ඉදිරිපත් කර තිබුණි. විශේෂයෙන් යම් නිවසකට යන විට දකුණු කකුළ පෙරදැරි කරගෙන යායුතු යැයි වැඩිහිටියෝ පවසති. එහෙත් එම කකුල් දෙකම අපගේය. ඉන් කුමක් කකුලක් වූවද පෙරදැරි කරගෙන යා හැකි බවට පැවසීම තුළින් කිසිදු හේතුවක් නොමැතිව බොහෝ අය රැගෙන එන සම්ප්‍රදායන්වලට සියුම් ආකාරයේ පහර දීමක් දැකගත හැකි විය. එමෙන්ම චිත්‍රපටිය පුරාවට සම්බන්ධම් භාවිත කරනු ලැබු චෙන්නායි භාෂාව ඉතා විශිෂ්ඨ මට්ටමක තිබු බව කිව යුතුමය. විශේෂයෙන්ම නව ප්‍රස්ථා පිරුළු කිහිපයක් භාවිත කළ ආකාරයක් දැකගත හැකි විය. නමුත් ඒවායේ අර්ථයක් නොමැති වූව ද එය සිනාසීමට තරම් ප්‍රයෝජනවත් විය. විශේෂයෙන්ම කමල්හසන් විසින් රචනා කරමින් ගායනා කළ “කන්දසාමි මාඩසාමි” ගීතය පුරාවට විවාහයෙන් ඇති වන ආනිසංස සම්බන්ධයෙන් සාකච්ඡාවක් නිර්මාණය කිරීමට සමත්වී තිබුණා යැයි කීමට හැකිය. දේව භක්තියකයෙකු නොවන කමල්හසන් මෙම චිත්‍රපටියේදී අවිවාහක යැයි පවසන දෙවිවරුන් වන්දනා කිරීමක් අපට දැකගත හැකි විය.

මෞලි විසින් අධ්‍යක්ෂණය කරනු ලැබු Pammal K. Sambandam හි රූගත කිරීම් මාස 3ක් ඇතුළත අවසන් කරනු ලැබිය. කමල්හසන් සහ සිම්රන් ප්‍රධාන චරිත නිරූපණය කළ අතර අබ්බාෂ් සහ ස්නේහා ආනන්ද්ගේ සහ මාලතිගේ චරිත නිරූපණය කළෝය. කෙසේ වෙතත් මීට පෙර මාලතිගේ චරිතය වෙනුවෙන් දෙවයානි නම් නිළියගේ නම යෝජනාවී තිබුණ ද අනතුරුව එම අවස්ථාව ස්නේහාට හිමි විය. එය ද චිත්‍රපටියෙහි තිබු ධනාත්මක ලක්ෂණයක් යැයි කීමට හැකිය. විශේෂයෙන්ම මෙම චිත්‍රපටියේ දෙබස් රචනය සිදු කර තිබුණේ ක්‍රේසි මෝහන් විසින්ය. මෙම චිත්‍රපටිය 2001 වසරේ දීපවාලිය වෙනුවෙන් තිරගත කිරීමට නියමිතව තිබුණ ද ආලවන්දාන් චිත්‍රපටිය තිරගත වෙමින් තිබු හේතුවෙන් මෙය 2002 වසරේදී තිරගත කරනු ලැබිය. මෙම චිත්‍රපටියෙහි කතාව පාදක කරගනිමින් 2009 වසරේ දී Kambakkht Ishq හින්දි චිත්‍රපටිය නිර්මාණය කිරීමත් විශේෂත්වයකි.

✍️ ජෙගන් ගනේෂන්